हमार सनेश सहकर्मी ,,
काठमाडौं := थारू समुदायक पहिचान व अधिकारक लाग सक्कु थारू समुदाय एकताबद्ध होक आघ बह्रपर्नाम अगुवाहुक्र जोड डिहेल बाट।
राष्ट्रिय जितिया पर्वक अवसरम थारू महिला सभा काठमाडौँ उपत्यका समितिसे मंगरक डिन आयोजना कर्लक कार्यक्रकम वक्ताहुक्र आदिवासी थारू लम्मा संघर्ष व बलिदानसे प्राप्त अधिकारक संस्थागत तथा बाँकी मुद्दाह टुङ्गोम पुगाइकलाग राजनीतिक दल तथा व्यक्तिगत स्वार्थसेफे उप्पर उठपर्ना औँल्याईल रहल । नेपाली काङ्ग्रेसक नेता विजयकुमार गच्छदार थारूक पहिचान व अधिकारक लाग पार्टीसे उप्पर उठ्ख एकताबद्ध ढङ्गसे मुद्दाम केन्द्रित हुईपर्ना धारणा ढर्ल । थारूक आपसी विभाजन व मुद्दाम बेइमेलक कारण थारू आन्दोलन निष्कर्षम पुग निसेक्लक कटी आबक डिनम मुद्दाह एकताबद्ध होक सशक्त व प्रभावकारी रुपम आघ बह्राक जइना उल्लेख कर्ल। पूर्वउपप्रधानमन्त्री समेत रलक नेता गच्छदार थारू आन्दोलनक क्रमम मेरमेरक मुद्दाम जेल पर्लक अगुवा रेशम चौधरी लगायत थारू नेताहुक्र कुछ डिनम जेलमुक्त हुईना दाबी फे कर्ल ।
नेपाल कम्युनिष्ट पार्टी नेकपाक सांसद अमनलाल मोदी थारूनक मुद्दाक लाग सुदृढ एकता अपरिहार्य हुईलक उल्लेख कर्ल । और सांसद गंगा चौधरी व मेटमणि चौधरी थारू जातिक पहिचान व अधिकारक आन्दोलनह सार्थक बनाइकलाग व्यक्तिगत स्वार्थ व पार्टीसे उप्पर उठ्ख एकताबद्ध होक आघ बह्रपर्ना जोर डेल ।
थारू कल्याणकारिणी सभाक पूर्व कार्यवाहक अध्यक्ष कन्नुलाल चौधरी थारूनकहोँर राज्यसे कर्ना व्यवहारम आम्हिन फे परिवर्तन निहुईलक चोह्री लगैटी पार्टी व आस्था जौनसुक रलसेफे सच्चा थारू हुईलक पहिचानक अधिकारक लाग एकजुट हुईपर्ना बटोईल रलह ।
थारू महिला सभाक अध्यक्ष तारा चौधरी थारू समुदायक राष्ट्रिय पर्व जितियाह राजधानीम बसोबास कर्ना थारू समुदायबीच आपसी भाइचारा व सद्भाव कायम कर विगत कुछ वर्षसे काठमाडौँम फे मनैटी अईलक बटेइली । कार्यक्रमम थारू, संस्कृति, पहिचान झल्कना विविध सांस्कृतिक प्रस्तुत कर्ल रलह । थारू भेषभूषाम सजलक थारू महिला तथा युवाक उल्लेख्य सहभागिता रहल रलहन । सो अवसरम थारू अधिकारक अभियानम योगदान कर्ना केशरी चौधरी, सीता चौधरी, रञ्जना चौथरी, डा.नरेन्द्रकुमार सिंह लगायतह सम्मान कर्गिल रह ।
ओस्हेक मंगरक डिन जो थारू महिला सभा मोरङ जिल्लाक आयोजनाम विराटनगरक विरेन्द्र सभागृहम हुइलक जितिया पर्व विशेष कार्यक्रमम बोल्टी थारू कल्याणकारिणी सभा दाङक क्षेत्रीय सभापति तथा थारू एकता युवाक अभियान्ता महेश थारू जोरदार रुपम कैलाली टीकापुर घटनाक बात उठाइल रलह । उहाँ कल, “सरकार १५७जन थारू उप्पर जबर्जस्ती मुद्दा लगैल बा व आम्हीसम् २६ जन्ह निर्दोष थारूहुकन विना कारण,विना प्रमाण तानाशाही शैलीम गिरफ्तार कैक बन्धक बनैल बा । कैयौंज निर्वासित जीवन विटैटी आइल बाट ।” रेशम चौधरीह ३४३४१ अत्यधिक जनमत प्राप्त कैक ऐतिहासिक विजय हासिल कैक फे आम्हीसम् निर्वाचन जिट्लक प्रमाणपत्र समेत निपैलक व सपथ ग्रहण समेत निकरिलक कटि आक्रोश व्यक्त कर्ल । कार्यक्रमक बर्का पहुना पूर्व वन तथा भू–संरक्षण राज्यमन्त्री भगवती चौधरी जितिया पर्वक शुभकामना डेटि मेरमेरिक विभेदक विरुद्ध आदिवासी जनजाति,मधेसी,मुस्लिम,दलित व पाछपरल सक्कु वर्ग एक हुइ पर्ना बटोइली ।
