कैलालीमे कठरिया थारुहुक्रे होलीके अवसरमे होरी उत्सव मनैले बाटै ।

राम दहित ,,

धनगढी := कैलालीमे कठरिया थारुहुक्रे होलीके अवसरमे होरी उत्सव मनैले बाटै ।
कठरिया समाज नेपाल ओ कठरियन पोष्टके आयोजनामे शनिच्चरके रोज बर्दगोरिया गाउँपालिका–६ कोटातुलसीपुरमे एक भब्य कार्यक्रम सहित उत्सव मनाइल हुइट ।

 होरी उत्सवके एक भब्य कार्यक्रमके बिच बर्दगोरिया गाउँपालिकाके अध्यक्ष बलिराम डगौंरा थारु ओ जोशीपुर गाउँपालिकाके उपाध्यक्ष गीता कठरिया उद्घाटन करल रहिट ।

कार्यक्रमके बर्का पहुना तथा गाउँपालिका अध्यक्ष डगौरा थारु कार्यक्रमहे सम्बोधन करटी होरी नाच कठरिया थारु समुदायके इतिहास बोकल बटैलै । अध्यक्ष डगौंरा अइना बरस होरी नाच प्रवद्र्धनके लाग गाउँपालिकासे बजेट विनियोजन कैना प्रतिवद्धता व्यक्त करल रहिट ।

ओस्टके कार्यक्रमके खास पहुना तथा जोशीपुर गाउँपालिकाके उपाध्यक्ष कठरिया थारु समुदायके लोक कला संस्कृति सहित पहिचान हेरैटी गैल ओरसे सक्कु जाने जर्गेनाके लाग लागे पर्ना बटैली । ओस्टके उपाध्यक्ष कठरिया अपने फेन आपन गाउँपालिकासे अइना बरस कठरिया समुदायके पहिचान जोरल होरी नाचके संरक्षण तथा प्रवद्र्धनके लाग बजेट विनियोजन कैना बटैली ।

कार्यक्रममे जोशीपुर गाउँपालिका वडा नं ३ के वडा अध्यक्ष किशोर कठरिया होरी नाच प्रवद्र्धनके लाग आपने एक महिनाके तलब सहयोग कैना उद्घोष करल रहिट । कार्यक्रममे नेपाली कांग्रेसके केन्द्रिय सदस्य हेम रावल फेन कठरिया समुदाय छुट्ट् पहिचान बोकल कला संस्कृतिके धनी समुदाय रहल बटाइल रहिट । उहाँ उ कला संस्कृति बचाइक लाग सक्कु जाने लागे पर्ना जोड डेहल रहिट ।

लोक कला, रिती सस्कृति संरक्षण तथा प्रवद्र्धन कैना उद्देश्यसे कठरिया समाज नेपाल ओ कठरियन पोष्टके आयोजनामे होरी उत्सव मनैना यी पहिल प्रयास रहल गीतकार सुवेश कठरिया बटैलै । लोप हुइटी रहल कठरिया समुदायके रिती संस्कृति तथा होली पर्व मनैना तौरतरिकाहे युवा पुस्ताहे जानकारीके लाग अइना बरस फेनसे उत्सवहे निरन्तरता डेना गीतकार कठरिया जानकारी डेलै ।
कार्यक्रममे कठरिया थारु समुदायके पुरान गीतबाँस, परम्परा, चालचलनहे प्रस्तुत करगिल रहे । कैलाली जिल्लाके २५ कठरिया गाउँसे सहभागिता जनाइल सांस्कृतिक टोलीसे सामूहिक होरी नाच नाचल रहिट । होरी पर्व कठरिया थारु समुदायके बरवार टिहुवार हो ।