रन्जन चौधरी,
कोल्हवी:= प्रदेश २ मा एसईई परीक्षा अन्तर्गत आज हुने भनिएको सामाजिक विषयको प्रश्नपत्र पनि बाहिरिएपछि परीक्षा स्थगित गरिएको छ ।
परीक्षा केन्द्र पुगेका परीक्षार्थीहरु फर्केका छन् । सामाजिक विषयको प्रश्नपत्र हिजो साँझ नै बाहिरिएको थियो । प्रश्नपत्र सामाजिक संजालमा समेत धेरैले शेयर गरेपछि परीक्षा स्थगित गरिएको हो । स्थगित गरिएको सामाजिक विषयको परीक्षा कहिले लिने विषयमा राष्ट्रिय परीक्षा बोर्डको बैठक बसिरहेको छ ।
परीक्षा केन्द्रबाट परीक्षार्थी फर्केपछि आक्रोसित बनेका छन् । बाराको कोल्हवी नगरपालिका स्थित श्री अनुपदिपनी उच्च मा.वि कोल्हवी र श्री ने.रा.उ.मा.बि सपही परीक्षा केन्द्रमा परीक्षा दिन पुगेका परीक्षार्थीहरुले प्रश्नपत्र आउट गर्नेलाई कडा कारबाही गर्नुपर्ने माग गरेका छन् । प्रश्नपत्र आउट कसैले गर्छन्, अनी सास्ती हामी विद्यार्थीले पाएको उनीहरुको भनाई छ ।
बारम्बार परिक्षा स्थगितको बिरोध गर्दै बिद्यार्थी लगायत स्थानीयहरुले बारा,पर्सा,रौतहट लगायतको जिल्लाहरुमा नाराजुलुस सहित आन्दोलन गरिरहेका छ्न।
विहिवार लिएको विज्ञान विषयको प्रश्नपत्र पनि बाहिरिएको थियो । सोही कारण विज्ञान विषयको परीक्षा रद्द गरिसकेको छ । विज्ञानको परीक्षा अब यही चैत्र २२ गते लिने भनिएको छ । स्थगित भएको सामाजिक विषयको परीक्षा चैत्र २३ मा लिइने सम्भावना छ ।
