चारै जना आरोपीले १३ लाख ५० रुपैयाँ दिनुपर्ने सर्तमा बलात्कारको मुद्दा गाउँमै गुपचुप राखियो। भदौसम्ममा पीडित परिवारले १३ लाख ५० हजार रुपैयाँ पाउनुपर्ने तमसुकमा भाखा तोकिएको छ।
मुख्य आरोपी मोहन मण्डल खत्वेले ४ लाख ५० हजार, अन्य आरोपी मसुन खत्वे, बद्री खत्वे र पवन खत्वेले ३–३ लाख रुपैयाँ तिर्दा पीडित परिवारले कानुनी बाटो नसमात्ने निर्णय गर्दै युवतीकी आमाको नाममा पञ्चायतले नक्कली तमसुक बनाइदियो। नक्कली तमसुकको साक्षीमा स्थानीय मिश्रीलाल खत्वे र नारायण साहले औंठाछाप लगाएका छन्। तमसुक कागजमा भने बलात्कार मामिला मिलापत्रबापत नलेखेर ऋण भनेर उल्लेख गरिएको छ।
‘बलात्कार प्रयासको घटना पैसाको लेनदेनमा मिलाएको सूचनापछि हामीले चारै जना आरोपीलाई नियन्त्रणमा लियौं,’ जिल्ला प्रहरी प्रमुख एसपी मुकेशकुमार सिंहले भने, ‘जघन्य अपराधमा पञ्चायती गरेर मुद्दामा मिलापत्र गर्नु पनि अपराध हो।’ बलात्कारको घटना पैसाको लेनदेनमा मिलाएको खबरपछि इलाका प्रहरी कार्यालय भेडियाका प्रहरी निरीक्षक सुरेन्द्रकुमार श्रेष्ठको नेतृत्वमा खटिएको टिमले फागुन २३ गते चारै जना आरोपीलाई पक्राउ गरेको थियो।
बलात्कार को पहिला गर्ने विषयमा विवाद हुँदा स्थानीयले थाहा पाएको प्रहरीको बयानमा स्वीकार गरेको एसपी सिंहले बताए। पक्राउ गरिएका चारैजना आरोपीलाई जिल्ला अदालत सप्तरीबाट म्याद थप गराएर जबरजस्ती करणीमा मुद्दा दर्ता गरिएको छ। एसपी सिंहले बलात्कार मामिला मिलाउने र कपाली तमसुक बनाउनेको पनि खोजी भइरहेको जनाएका छन्।
