राम दहित,,
हसुलिया:= टीकापुर घटनाबारे केन्द्रिय थारु नेताहुक्रे सम्बन्धित ठाउँमे आवाज नाइ उठाइल कारण निर्दोश थारु अनाहकमे जेल जीवन बिटाई परल एक कार्यक्रमके सहभागीहुक्रे औल्याइले बाटै ।
सोम्मारके रोज थारु कल्याणकारिणी सभा कैलालीके आयोजनामे हसुलियामे हुइल टीकापुर घटनाबारे जनजागरण अभियान अन्तरक्रिया कार्यक्रममे बोलुइया अधिकांश वक्ताहुक्रे केन्द्रिय थारु नेतृत्वकर्ताहुक्रनके कारण निर्दोष थारु राजवन्दी जीवन बिटाई पर्ना बाध्य रहल बटाइल रहिट । टीकापुर घटनाबारे केन्द्रमे रहल थारु नेता एकजुट नाइ हुइना साथे घटनाबारे चासो तथा आवाज नाइ उठाइल पाछे टीकापुर घटनाके समयमे सुनुवाई नाइ हुइल उहाँहुक्रनके आरोप रहे ।
थारु कल्याणकारिणी सभाके केन्द्रिय सदस्य रामचरण चौधरी केन्द्रमे पुगल थारु नेतृत्वकर्ताहुक्रे थारुनके हकअधिकार ओ टीकापुर घटनाबारे आवाज उठैनामे चुकल बटैलै । कार्यक्रमके बर्का पहुना समेत रहल केन्द्रिय सदस्य चौधरी थारु नेताहुक्रे एकजुट नाइहोके फेन थारु समुदाय हक अधिकारसे बञ्चित हुइ पुगल बटैलै ।
उहाँ चुनावके बेला थारुनके हक अधिकारके लाग बरा बरा बात बट्वाइना मने ठाउँमे पुग्लेसे सक्कु चीज बिस्रैना बटैलै । यिहीसे थारुहुक्रे हक अधिकारसे वञ्चित हुइनाके साथे समयमे टीकापुर घटनाके सम्बोधन हुइ नाइ सेकल बटैलै ।
कार्यक्रममे थाकस केन्द्रिय सदस्य राजसमझ चौधरी टीकापुर राजनीतिक मुद्धा रहल ओरसे राजनीतिक रुपमे सुल्झाइ पर्ना जोड डेहल रहिट । ओस्टके थाकसके केन्द्रिय पार्षद कृष्णकुमार चौधरी कुन्दन थारु आपन हक अधिकार मागके नाइ अँछोरके लेहे पर्ना बटैले रहिट । मागके हक अधिकार मिल्ना दिन गैल बटैटी उहाँ सक्कु ठाउँमे अँछोरके हकअधिकार लेहे पर्ना औल्याइल रहिट । ओस्टके उहाँ टीकापुर घटना, रेशम चौधरीहे प्रमाण पत्र सहित सपथके लाथ सक्कु ओरसे दबाब डेना आवश्यक रहल उहाँ बटाइल रहिट ।
कार्यक्रममे थाकसके पूर्व कैलाली जिल्ला अध्यक्ष प्रभात कुमार चौधरी थारु सक्कु क्षेत्रमे चेपुवा पाइल बटैलै । उहाँ आपन हक अधिकार अब्बेहे नाइ लडभीडके माग्लेसे अइना पिढीहुक्रनहे झन समस्या पर्ना बटैलै ।
कार्यक्रम जनप्रतिनीधी, बडघर भलमन्सा, थारु बुद्धिजिवीहुक्रे आपन विचार राखल रहिट । उहाँहुक्रे थारु नेतृत्वकर्ताहुक्रनके कारण थारु समुदाय हकअधिकारसे वञ्चित हुइ पर्नाके साथे टीकापुर घटना लब्याइटी गैल औल्याइल रहिट ।
थाकस कैलारीके अध्यक्ष आशोक चौधरीके घरगोसियाइमे हुइल कार्यक्रममे क्षेत्रीय उपाध्यक्ष कृष्ण कुमार चौधरी स्वागत मनतब्य राखल रहिट । ओस्टके कार्यक्रमबारे थाकस कैलालीके कार्यबाहक सभापति माधव चौधरी जानकारी कराइल रहिट ।
कार्यक्रमके सञ्चालन थाकस कैलारी गाउँपालिकाके उपाध्यक्ष सुनीता चौधरी करल रही । कार्यक्रममे तमान राजनीतिक दलके प्रतिनीधी, बडघर भलमन्सा, समाज सेवी वुद्धिजीवीहुक्रनके सहभागिता रहल रहे ।
