-प्रणव आकाश, ख्याल बगाल
ठारु गिट जुझिकजुझा हुइटिरहल ब्याला और गिटह पाछ पर्टी श्रोटा हुकनके मन च्वारकलाग चम्पन साँस्कृतिक समुहके प्रस्तुतिम लौव गिट रेकर्ड होक डब्नी भेर्या म उटर स्याकल बा। इश्वरा चौधरी लिख्लक "साली आइ, साली आइ मेला हेरे जाइ " बोलक गिटम सन २०१५ के मिस्टर नेपाल फाइनलिस्ट दोष हरण चौधरी ओ बसन्ती चौधरी आवाज डेल बाट।
चोभर डरुवम भखर कुछ डिन आघक भिडियो शूटम ठारु भेषभुषाम डर्वा छपक्क रह।ठारुन्के भेषभुषा हेर्खे बाहारक मनै चकिट परट डेख्परट। ठारु भेषभुषाक संरक्षण कर्टी एकठो ज्वान ठरिया कसिक आपन सालिह फकाइठ ओ साली कसिक भाटुसे भुल्ठी कना बिषयम आधारित गिट निमाङ मैयाप्रेमले भरल बा। युवा पुस्ताहन लक्षिट कैख लिख्लक यी गिट ढ्यार युवनके मन जिट्नाम संका निकर पर्ना गिटकार बट्वारख्ल।
अन्जु चौधरी ओ दोषहरण अप्नहे मोडल के रुपम रहल म्युजिक भिडियो कुछ डिन पाछ युट्युब मसे सार्वजनिक कर्ना निर्माण टिम जनैल बा।गिटम राजेश क्षेत्रीके संगित, हरिनारायन चौधरिक छाँयांकन, बसन्ती चौधरिक निर्माण बा कलसे गिटक भिडियो ह दीपक चौधरी ओ दिपक चौधरी "दिप" निर्देशन कर्ल बाट।
मोडल अन्जु ओ दोष हरण क अभिनयम रहल पैल्हा थिएट्रीकल ठारु नाटक " भुरभुरा रहर " पुसके द्वासर हप्टा सर्वनाम थिएटर कालिकास्थान काठमाडौ म मन्चन हुइना टयारिम बा।
