धनगढी:= गैल फागुन २४ गते अन्तर्राष्ट्रिय नारी दिवसके दिन बोक्सी भगैना कहटी पिटुवा पाइल राधा चौधरीहे आर्थिक सहयोग प्राप्त हुइल बा ।हाल बेलायतमे बैठ्टी आइल खोटाङ बाक्सीला ८ के जयन्ती राई पीडित राधाके अध्ययन खर्चके लाग कहटी ५० हजार रुपैया सहयोग करल हुइट । उहाँ पत्रकार दिपक उपाध्यायहे उ रकम पठाइल हुइट ।
उ ५० हजार रुपैया मंगलके रोज जिल्ला प्रशासन कार्यालय कैलाली मार्फत राधाहे हस्तान्तरण करगिल बा । कैलालीके प्रमुख जिल्ला अधिकारी ऋषिराम तिवारी, जिल्ला प्रहरी कार्यालय कैलालीके प्रमुख प्रहरी उपरिक्षक विनोद घिमिरे ओ पत्रकार उपाध्याय संयुक्त रुपमे राधाहे उ रुपैया हस्तान्तरण कर्ले बा ।राधा उप्पर हुइल अमानवीय घटनाबारे टमान संचारमाध्यमसे जानकारी पाइलपाछे जयन्ती राई चित्रकला मार्फत संकलन हुइल रुपैया राधाहे अध्ययन खर्चके लाग सहयोग करल हुइटी । राई आपन भतिजीयाक् पास्नीमे आइल छरछिमेकके बालबालिकाहुकनहे चित्रकलामे सहभागी कराके उ रकम संकलन करल पत्रकार उपाध्याय बटैलै ।
घोडाघोडी नगरपालिका–५ देउकलियाके राधा हाल सुखडस्थित राष्ट्रिय माध्यमिक विद्यालयमे कक्षा ११ मे अध्ययनरत बाटी । यहे वैशाख ३० गतेसे सुरु हुइना परीक्षाके तयारी करटी रहल उहाँ अध्ययनके लाग विदेशसे सहयोग करुइया राईहे धन्यवाद ज्ञापन करटी सहयोग करलमे आभार व्यक्त कर्ली ।कैलालीके प्रमुख जिल्ला अधिकारी तिवारी ध्यान डेके अध्ययन करेक लाग राधाहे आग्रह कर्ली । उहाँ सहयोग प्राप्त रुपैयाहे शैक्षिक खर्चबाहेक अन्यत्र खर्च नैकरेक पर्ना ओ बैङ्कमे सगेना लगाके राखेक पर्ना सल्लाह डेलै ।अन्तर्राष्ट्रिय नारी दिवसके दिन देउकलियाके रामबहादुर चौधरी उर्फ भोलेबाबा, अपनहे पार्वती कह्ुइया किस्मती चौधरी, स्मारिका चौधरी लगायत बोक्सीके आरोप लगाके राधाउप्पर निर्घात कुटपिट सहित यातना डेहल रहिट । उहाँहे यातना डेहुइया रामबहादुर सहितके व्यक्तिहे पुर्पक्षके लाग थुनामे राखगिल बा ।
घटना हुइल दुई महिना बित्से फेन गाउँमे अभिन फेन कुछ मनै बात कट्टी आइल राधा सुनैली । छर छिमेकीहुक्रे मजासे बोलचाल कर्लेसे फेन कुछ मनै पुराने दृष्टिकोणसे हेरटी रहल उहाँ बटैली । मने विद्यालयमे शिक्षक ओ साँघरियाहुक्रे भर मजासे व्यवहार करटी रहल उहाँके कहाई बा ।source:-muktik dagar
