हमार सनेश ड्टकम,,
काेटातुल्सिपुर/कैलाली,,
कैलालीके कठरिया थारुहुक्रे होलीके अवसरमे प्रथम कठरिया होरी पबनी उत्सव-२०७५ मनैना हुइल बाटै ।
कठरिया समाज नेपाल ओ कठरियन पोष्टके आयोजनामे अइना चैत्र ९ गते बर्दगोरिया गाउँपालिका–६ कोटातुलसीपुरमे एक भब्य कार्यक्रम आयोजना कैके उ उत्सव मनैना हुइल हुइट।
कठरिया थारु समुदायके लोक कला, रिती सस्कृति संरक्षण तथा प्रवद्र्धन कैना उद्देश्यसे होरी उत्सव आयोजना करे लागल कठरियन पोस्ट के संयोजक श्री जनक कठरिया ज्यु जानकारी डेलै । ओस्टके लोप हुइटी रहल कठरिया समुदायके रिती संस्कृति तथा होली पर्व मनैना तौरतरिकाहे युवा पुस्ताहे जानकारीके लाग फेन उत्सव आयोजना करे लागल संयोजक जनक कठरिया जानकारी डेलै ।
होरी उत्सव मनाइक लाग आज मंगरके एक बैठक से स्थान ओ मिति लगायतके आवश्यक तयारीके लाग समिति फेन गठन करगिल बा । बर्दगोरिया गाउँपालिका ओ जोशीपुर गाउँपालिका कार्यक्रमके प्रर्वधक रहल कार्यक्रममे जिल्ला भरके कठरिया गाउँक करिब तीन हजार कठरिया हुक्रनके जमघट हुइना जनाइल बा ।
कार्यक्रममे कठरिया थारु समुदायके पुरान गीतबाँस, परम्परा, चालचलनहे प्रस्तुत कैना जनाइल बा । ओकर लाग हरेक गाउँसे सांस्कृतिक कार्यक्रम सहित सहभागिता जनाइ पर्ना आयोजक जनैले बा । कठरिया थारु समुदायके यी पहिल वृहत कार्यक्रम हो ।
