धनगढी:= नेकपा माओवादी (केन्द्र) प्रदेश नम्बर ७ के मुख्यमन्त्रीके लाग डोेटीसे प्रदेशसभामे निर्वाचित सांसद त्रिलोचन भट्टहे सिफारिस कर्ले बा ।
वाम गठबन्धनसे प्रदेश नं ७ मे मुख्यमन्त्री माओवादी केन्द्रहे डेना सहमति करल संगे उ दल शुकके रोज पार्टीके प्रदेश कार्यालयसे सांसद भट्टके नाम सिफारिस करल खुलल बा ।
उ दलके प्रदेश नं ७ संयोजक लक्ष्मणदत्त जोशी शुकके रोज काठमाडौँमे हुइल प्रदेश कार्यालयके बैठकसे भट्टहे मुख्यमन्त्रीमे सिफारिस करल जानकारी डेलै । उहाँके अनुसार अबके दुई÷तीन दिनभिट्टर केन्द्रसे टुंगो लग्न हुइल बा ।माओवादीमे भट्टसंगे कैलालीसे निर्वाचित सांसद वीरमान चौधरी ओ दार्चुलाके सांसद मानबहादुर धामी, अछामसे निर्वाचित सांसद झपट बोहरा, अक्कल रावलके नाम चर्चामे रहे ।मने प्रदेश नं ७ के अस्थायी मुकाम धनगढीमे कायम करके पहाडहे मुख्यमन्त्री डेके सन्तुलन मिलैना क्रममे भट्टहे माओवादीसे सिफारिस करल आँकलन करगिल बा ।
यहेबीच मुख्यमन्त्री पहाडहे सिफारिस करल टमान सञ्चारमाध्यममे समाचार अइलपाछे थारु समुदायके अगुवाहुक्रे धोखा हुइल कहटी आपत्ती जनैले बाटै । थारु समुदायहे केवल भोट बैंकके रुपमे प्रयोग करल उहाँहुकनके कहाई बा ।
चुनावी घरदैलोके क्रममे वामगठबन्धनसे कैलालीके मसुरियामे ३७ बुँदे प्रतिवद्धता जारी करल रहे । थारु राष्ट्रिय मुक्ति मोर्चा नेपालके महासचिव हरिराम चौधरी ओ लोकतान्त्रिक थारु संघ नेपालके केन्द्रीय सदस्य एंव प्रदेश सांसद चुनकुमारी चौधरीसे हस्तक्षरित ओ माओवादी केन्द्रके प्रदेश संयोजक लेखराज भट्टके बरका पहुनाईमे हुइल कार्यक्रममे उ प्रतिवद्धतापत्र जारी हुइल रहे ।
प्रतिवद्धतापत्रके ३ नम्बर बुँदामे प्रदेश प्रमुख ओ मुख्यमन्त्री मध्ये एक थारु समुदायहे डेना उल्लेख बा । जौन प्रतिवद्धताके प्रचार करटी वामगठबन्धन चुनाव जितल रहे । मने प्रतिवद्धता पूरा नैहुइलपाछे थारु समुदाय धोखा हुइल महसुस कर्ले बा ।
प्रतिवद्धतापत्रके हस्तक्षरकर्ता चुनकुमारी चौधरी बहुट भारी घोखा हुइल बटैली । प्रतिवद्धतापत्र चुनावी लक्षित किल रहल सावित हुइल बटैटी उहाँ माओवादी केन्द्रसे धोखा हुइल आरोप लगैली । ‘प्रतिवद्धता पूरा नैहुइल, मुख्यमन्त्री माओवादीके भागमे गैल रहे, माओवादीसे धोखा हुइल’, उहाँ कहली ।
ओस्टके माओवादी केन्द्रके कैलाली इन्चार्ज एंव प्रतिवद्धतापत्रके हस्तक्षरकर्ता हरिराम चौधरी ‘उत्सव’ प्रतिपद्धतापत्र अनुसार प्रयास कर्लेसे फेन पूरा नैकरल कहटी आपन बात तारल रहिट । पार्टीसे आधिकारिक रुपमे घोषणा कर्ना बाँकी रहल जवाफ डेटी उहाँ मुख्यमन्त्रीके सवालमे पहुरा थारु दैनिकसे ढिउर बोल्न नैचाहलै ।
यहेबीच मुख्यमन्त्रीके दावेदार एंव सांसद वीरमान चौधरी समाचारमे आइल विषयवस्तु सत्यके बहुट लग्गे रहल स्पष्ट पर्लै । उहाँ अप्ने मुख्यमन्त्रीके लाग सिफारिस नैहुइल फेन संकेत कर्लै ।
साभार:-मुक्तिक डगर
