हमार म्युजिक बगियाके पहिल बार्षिकोत्सव समारोह सम्पन्न/उत्कृष्ठ कलाकर्मीहुक्रनहे अवार्ड सहित सम्मान

मसुरिया:= राष्ट्रिय सभा सदस्य हरि चौधरी हमार म्युजिक बगिया प्रालिसे मिडियाके माध्यमसे थारु कला संस्कृति संरक्षण सम्बद्र्धन कैनाके साथे विश्वमे चिन्हैना सफल हुइल बटैले बाटै ।
शनिच्चरके रोज मसुरियामे हुइल हमार म्युजिक बगियाके पहिल बार्षिकोत्सव समारोहहे सम्बोधन करटी सदस्य चौधरी उ बात बट्वाइल हुइट । 

गौरीगंगा नगरपालिका वडा नं. ८ मसुरिया साझा बजारमे रहल हमार म्युजिक बगिया मिडिया मार्फत थारु कला संस्कृतिके संरक्षणके साथे विश्व सामु चिन्हैटी रहल सदस्य चौधरी बटैलै । कलेसे बर्का पहुना सदस्य चौधरी आपन ओरसे सेक्नासम सहयोग रहना बटैलै ।
कार्यक्रममे कैलाली गाउँपालिकाके अध्यक्ष लाजुराम चौधरी, कैलारी गा.पा वर्डा नं ८ के वडा अध्यक्ष दुखीराम कठरीया, गौरीगंगा नगरपालिका वडा नं ११ के वडा अध्यक्ष विनोद चौधरी लगायत मनतब्य राखल रहिट ।
कम्पनी स्थपाना हुइल एक बरस पुरा करल अवसरमे संगीतके तमान १० विधामे उत्कृष्ठ कलाकर्मीहुक्रनहे अवार्ड सहित सम्मान करल बा । अवार्ड प्राप्त करुइया कलाकारमे थारु सांस्कृतिक गायकमे ..सात समुन्द्र गीत.. बर्दियाके सन्तराम चौधरी ओ गायिका समिक्षा चौधरी, सम्पादनमे टनाटन गीतके सतिश सिन्हा, निर्देशकमे चुरीया गुरीयाके सुधराम दहित, छाँयाङकनमे बर्षा देहो प्यार तु के विहारी दहित, शब्द चुरीया गुरीयाके सुवेश कठरीया, चुरीया गुरीयाके मोडल एलीशा चौधरी, याद आईती रहठ गीतके मोडल महेश चौधरी, आधुनिक गायिका चुरीया गुरीयाके मनिषा पोखरेल ओ आधुनिक गायकमे बर्षा देहो प्यार तु के आनन्द कठरीयाहे अवार्ड सहित सम्मान करल बा ।

हमार म्युजिक बगिया प्रालीसे सार्बजनिक हुइल गीत संगीतसे थारु नायक प्रेम चौधरी, निर्देशक चन्द्र चौधरी ओ जन्तिराम चौधरीके ३ सदस्यीय निर्णायक मण्डल उत्कृष्ट छनोट करल रहे । एक बरसके अबधिमे कम्पनीसे २९ ठो म्यूजिक भिडियो आपन ब्यनारमे निर्माण करल अध्यक्ष बीर चौधरी जानकारी डेलै ।कलेसे हमार म्यूजिक बगिया यूटुब च्यानलसे १ सय ४६ ठो गीत भिडियो तथा अडियो सार्वजनिक करसेकल समेत अध्यक्ष चौधरी जानकारी डेलै । उहे कार्यक्रमके बिच बोक्सीनीयाके आरोपमे गत फागुन २४ गते यातना पाइल राधा चौधरीहे सम्मान कैनाके साथे नगद १० हजार ८ सय आर्थीक सहयोग करगिल रहे ।