हसुलिया:= पूर्वकमलरी पार्वती चौधरी खाजा नास्तासे मासिक लाखौ कमैना सफल हुइल बाटी ।
कैलारी गाउँपालिका वडा नं. १ सिमरीपुरके २२ वर्षिया चौधरी हसुलिया बजारमे सुवाश किराना तथा चिया नास्ता पसल सञ्चालन कैके दैनिक दुइ हजारसे तीनहजारसम कमैना सफल हुइल बाटी ।
घरके दयनीय अवस्था रहल कारण पार्वती दुई बरस धनगढीमे कमलरी बैठ्ना बाध्यता रहल बटैली । मने २० दिनके खाजा नास्ता बनैना तालिम पश्चात पूर्वकमलरी पार्वती एक बरस यहोर खाजा नास्ता पसल सञ्चालन करटी रहल बाटी ।
‘घरक अवस्था दयनीय रहे, पेटपालक हुइलेसे फेन कमलरी बैठ्ना बाध्य रहुँँ, पार्वती कहली ।’ आर्थिक अवस्थाके कारण पार्वती ९ कक्षासम किल पह्रे पाइल सुनैली । ‘नौ कक्षासम किल पह्रे पैनु ओट्ठनसे मोर पह्राइमे पूर्ण विराम लागगैल ।’
पार्वती पह्रके बरा मनै बन्ना सपना डेख्ले रही । मने पह्राइ बिचमे छुटलसंगे उ सपना चकनाचुर हुइ पुगल । ‘ढिउर पह्रके बरा मनै बन्ना सपना डेख्ले रहुँ पार्वती कहली । मने बिच्चेमे पह्राई छुटके सपना सपनामे किल सिमित हुइ पुगल ।’
मने पह्राइ छुट्लेसे फेन पार्वती अब्बे पसल सञ्चालन कैके घर व्यवहार सञ्चालन मजासे कैटी रहल बाटी । मुक्त कमलरी विकास मञ्च कैलाली ओ नेपाल युथ फाउण्डेशन नामक संस्थाके सहयोगमे पार्वती नेपालगंजमे २० दिने खाजा नास्ता बनैना तालिम लेके पसल सञ्चालन करटी रहल बाटी । तालिम पश्चात नेपाल युथ फाउण्डेशन नामक संस्थाके आर्थिक सहयोगमे उहाँ २०७४ साल हसुलियामे बजारमे पसल सञ्चालनमे लानल हुइटी । पसल सञ्चालनके लाग पार्वतीहे संस्थासे नगद १५ हजार ओ भाडाबर्तन लगायतके सहयोग करल रहे ।
पार्वती अब्बे उहे पसलसे घर खर्चसे लेके आपन भैयाहे फेन स्कूलमे पह्रैटी रहल बाटी । ‘दैनिक दुई हजारसे लेके तीनहजार कमाई हुजाइठ्, पार्वती कहली ।’ ‘यिहीसे घरखर्च फेन चलैठु आपन भैयाहे फेन पह्रैठु ।’ दाईबाबा ओ दादादिदी बटैयाके खेती करटी रहल पार्वती अपने भर खाजा नास्ता पसल सञ्चालन करटी रहल बाटी ।
हसुलिया बसपार्कमे रहल पार्वतीके खाजानास्ता पसलमे चियाके साथे समोसा, चाउमिन, पकौरा, चना लगायतके खाजाके परिकार बनैना करठी । खाजा नास्ता बेचके पार्वती खर्च बचाके दैनिक सहकारीमे बचत फेन कैटी रहल सुनैली ।
ओस्टके कैलारी गाउँपालिका वडा नं. ७ विपतपुर मुक्तकमैया शिविरके रिता चौधरी फेन सुशान्त नास्ता पसल सञ्चालन कैके आपन घर व्यवहार चलैटी रहल बाटी । नास्ता पसलसे रिता फेन पार्वतीके जस्टे कमाइ हुइटी रहल बटैली । गाउँघरमे फेन मःम, चाउमीन, समोसा, पानीपुरी, चाटके खाजा नास्ता पाइलपाछे ओकर स्वाद लेहे स्थानीयहुक्रे नास्तापसलमे अइना करल बटैली । नेपाल युथ फाउण्डेशन संस्थाके सहयोगमे रिता फेन पसल सञ्चालन कैके गौहीमे मजा कमाई करटी रहल बाटी ।
मुक्त कमलरी विकास मञ्चके केन्द्रिय सचिव सुजाता चौधरी आयआर्जनके लाग डेहल खाजा नास्तासे ढिउर पूर्वकमलरी खाजा नास्ता पसल सञ्चालन करटी रहल बटैली । जिल्लामे सयौंके संख्यामे खाजा नास्ता लगायत अन्य व्यवसाय सञ्चालनमे लागल पूर्वकमलरीहुक्रे कैलारी गाउँपालिकामे किल २५÷३० जनहनके हराहारीमे खाजा नास्ता पसल सञ्चालन कैके आयआर्जन लागल उहाँ बटैली ।
(साभार :=कैलारी अनलाइनबाट )
