यि देशके मुहार फेरुइया, युवा जुरमुराईत आब

सरकारह थिहुन टेकुइया, युवा जुरमुराईत आब

१
मुक्टक
का सोच्ठो टुँ महिन थाँहा निहो, छरिड बा मन
टुँहिन बाहेक किहुन चाहा निहो, छरिड बा मन
खै कसिख बाझल हमार मैगर मैया,रस चुस्ना,
बारी-बिउँराम लग्ना माहा निहो, छरिड बा मन

२
कबु दु:ख ट कबु सुखक, मेल हो हमार जिन्गी
कबु जिट्ना कबु हट्ना, खेल हो हमार जिन्गी
न्याग जानो ट लिरौसी नै जानो ट कठिन बा,
आपन रप्टारम नेग्ती रना, रेल हो हमार जिन्गी

३
महिन मैया मर्ली काहु, ना कल ना ट एस.एम.एस
अन्त डेरा सर्ली काहु, ना कल ना ट एस.एम.एस
मै टुँहार बिना एक पलफे जिए नै सेकम कना मनै,
उ स्वाङ कहर्ली काहु, ना कल ना ट एस.एम.एस

४ मुक्टक
आज हुकहिन भुल्ना साहास, जुटाउ कसिख मै
रुइती रहल यि म्वार जियरा, बुझाउ कसिख मै
आपन जिउ ज्यानसे ध्यार मैया कर्ख गल्टी कर्नु,
गिरैलो समाजके लजरम शिर, उठाउ कसिख मै

५ मुक्टक
टुँहार मैया महि मन बहलैना बस्ती बनल आज
म्वार कम्जोरी अउरक लाग मस्ती बनल आज
कसिख बटाउ मै, आपन मैया, प्यारके कहानी
टुँहार याद यि ढकढिउराक गस्ती बनल आज

६ मुक्टक
देख्नु कज्रयार हुकाहार आखिक भाँउ, मन परल
मनमन सोच्ती पुछ पुग्नु हुकाहर नाँउ, मन परल
पापी मनह रवाक नैसेक्नु आजर पाजर पुछ्ती,
नाँउ लेति खोज्नु हुकाहार मैगर गाँउ, मन परल

७ मुक्टक
रसरस केक्रो मैया जालम फसहस लागल महि
हुकाहार याडकर्ती हुकहिन बसहस लागल महि
कठ भुख, पियास, निद, नै लग्ना रोग लागल हु,
खाए ना पिए कमजोरीले खसहस लागल महि

८
हमार मैगर मैया छुटल, पागल होख मुव नैसेक्नु
जुनिजुनिक नात टुटल, पागल होख मुव नैसेक्नु
खाइल उ बाचा कसम, सपना सारा सम्या गैल,
अविरलके करम फुटल, पागल होख मुव नैसेक्न

९
यि देशके मुहार फेरुइया, युवा जुरमुराईत आब
सरकारह थिहुन टेकुइया, युवा जुरमुराईत आब
गणतन्त्र, प्रजातान्त्रसंग लोकतन्त्रफे आइल काहु
निरंकुश राजतन्त्र मेटुइया, युवा जुरमुराईत आब

१0
उ सुरटार बोलीम, फसुइया ध्यार बाट दुनियाँम
समाजके लजरसे, खसुइया ध्यार बाट दुनियाँम
स्वार्थ बा यि दुनियाँ, किहि क्याकर का मतलब,
औरक दु:खपिडाम, हसुइया ध्यार बाट दुनियाँम

११ मुक्टक
हुकाहार म्वार लजर जुझल, सुरु हुइल प्रेम कहानी
इ हृदाक बात उ हृदा बुझल, सुरु हुइल प्रेम कहानी
जात मैगर लस्गर ना छलछलाहा ना त फलफलाहा,
आनि बानी जातिक सुझल, सुरु हुइल प्रेम कहानी

१२ मुक्टक
टुँहार उ छल्छलाहा चाल, देख्क अन्कुस लग्ठा हेरो
कसिन लगाम जिउ'दाल, देख्क अन्कुस लग्ठा हेरो
मेकप कर्नाफे ट सिमा रठा जे काहु, सावर मनैफे,
का का घस्थ भुवर गाल, देख्क अन्कुस लग्ठा हेरो

१३
बेल्सती लिरैसी लग्ना हमार, मैगर लरम थारु भाषा
सुन्ती सुहावन, मिठ, सुरटार, मैगर लरम थारु भाषा
भाषा, कला, संस्कृती हमन चिहनैना असली पहिचान,
जात सिट्टर, लस्गर, मैलार, मैगर लरम थारु भाषा

१४
नौ लड्यक सयर कर्ती, अइती बाटु टुँहिन लेह
आपन पौली आघ सर्ती, अइती बाटु टुँहिन लेह
मन्ने नै हु आधीबौखा, डरैने नै हु प्यारके लाग,
कटाँहा उ बेह्न्वा फर्ती, अइती बाटु टुँहिन लेह

१५
टुँहार पठाइल उ चिट्ठी पहर्टी, बिटल सारा रात
फगटम मै एकहले विलाैना कर्टि, बिटल सारा रात
आखिर छोर्ना रह ट, मैयक नाटक कर्लो काजे टुँ,
रुइटी,भुईयम गिरल आस बहर्टी, बिटल सारा रात

१६ मुक्टक
यि ढकढिउरक बात हुकहिन बटाई नै सेक्ठु
यादै-यादले छट्पटैठा मन सम्झाई नै सेक्ठु
कत्रा हुइल खरबास कापिक पन्ना ओ मसि,
टुँहार नाँउम लिखल चिट्ठी पठाई नै सेक्ठु

१७
हुकहिन भुल्ना साहास आज, जुताउ कसिख
रुइती रहल यि म्वार जियरा, बुझाउ कसिख
बेचैनी ओ छटपटिम कट्टी बा सारा रातडिन
रसरस धुवाइती जरता इ मन, बुटाउ कसिख

१८ मुक्टक
नैचही कौनो कुजि टुँहिन, हृदक ड्वार खुल्ला बा
कर्ख मैया टुँ, डराउ जिन, हृदक ड्वार खुल्ला बा
जिन्गीभर पुग्ना मैया देम अन्त लजर जिन लगाउ,
दु:ख सुख सट्बी हरडिन, हृदक ड्वार खुल्ला बा

१९
मन पराइल खै कसिन बाट टैजान, कथी म्वार दाई
होस करस छावा नै ट परही हैरान, कथी म्वार दाई
यहोर ओहर चारुवर टै लजर जिन लागा हेर छावा,
झट्टह बरु दहिटान बेत्या लैआन, कथी म्वार दाई

२०
टुँहार रुपके बयान कर्ना शब्डा खोज्टि रहिगिनु
रातडिन खाली टुँहार नाउँ केल घोस्टि रहिगिनु
लस्गर, मैगर, सुघर, गोरहर, नस्य ठुन्यार देख्नु
कौन शब्डा बेल्सु मै ट शब्डाम लोट्टि रहिगिनु

म्वार परिचय
बोल्कर्ना नाऊ: लब अबिरल
जाट्टिक नाऊ: लब बहादुर चौधरी
जरम मिति: २०४६ फागुन १३ गते
डाई ओ बाबा: भिखनी चौधरी ओ तेज बहादुर चौधरी
शिक्षा :बिएड, जारी
जरम ठेगाना: पाताभार- ५, उल्टनपुर, बर्दिया
हालके ठेगाना: गुलरिया १, पन्ध्र न. , बर्दिया
रुची: पत्रपत्रीका पह्र्ना, भ्रमन कर्ना, रेडियो सुन्ना
साहित्यक सिर्जना कर्ना, अस्ट अस्ट.........

प्रकाशित पोस्टा :
* बसेरा (संयुक्त मुक्टक संग्रह ,२०७३)
* बहल याद (संयुक्त मुक्टक संग्रह, २०७३)
* मैयक बोली (संयुक्त गजल संग्रह, २०७३)
* हल्कोरा (संयुक्त मुक्टक संग्रह, २०७३)

आबद्ध / संग्लग्नता:
कार्यक्रम प्रस्तोता: रेडियो बबई १०६ मेगाहर्ज, गुलरिया, बर्दिया (२०७१ ठेसे)
कोषाध्यक्ष: जंग्रार साहित्यक बखेरी बर्दिया शाखा (२०७२ ठेसे)
आजिवन सदस्य: हर्चाली साहित्यक त्रैमासिक
पत्रीका, धनगढी ,कैलाली
(२०७२ ठेसे)
सचिब: जंग्रार साहित्यक बखेरी केन्द्रिय (२०७३ ठेसे)
सचिब: थारु उत्थान मन्च (२०७३ ठेसे)

अनुभव:
रेडियो कार्यक्रम प्रस्तोता :
> साहित्यक मझ्यारी, (
> उल्झलमनक बात, ओस्टहक
> अप्नक प्रतिभा हमार प्रस्तुती

रेडियो बबई १०६ मेगाहर्ज,गुलरिया, बर्दिया (२०७१
ठेसे), जारी,

सम्पर्क:
E-mail ID: loveabiral393@gmail.com ,
                  hamarpahichan@gmail.com
Facebook: www.facebook.com/love2046
phone No.:+9779848178142